Xyriel Manabat Emosyunal Dahil Tumagal Kahit Papaano Sa Loob Ng ‘Bahay Ni Kuya’

Hindi inaasahan ni Xyriel Manabat, ang dating child star na ngayon ay isang Kapamilya actress, na magtatagal siya sa loob ng Bahay ni Kuya. Ayon sa kanya, inakala niyang isang linggo lang ang itatagal niya sa sikat na reality show na Pinoy Big Brother: Celebrity Collab Edition.

Ngunit sa kabila ng kanyang inaasahan, si Xyriel ay nanatili ng mahigit isang buwan sa loob ng bahay ni Kuya. Sa episode kung saan siya ay na-evict kasabay ng kapwa housemate na si Vince Maristela, taos-puso ang kanyang pasasalamat sa lahat ng naging bahagi ng kanyang paglalakbay sa loob ng PBB house.

Sa isang video na ibinahagi ng Star Magic sa social media, makikitang emosyonal ngunit positibo ang aktres habang ipinapahayag ang kanyang taos-pusong pasasalamat sa mga sumuporta sa kanya mula simula hanggang dulo ng kanyang PBB journey. Pinangunahan niya ang pasasalamat sa mismong si Kuya na nagbigay sa kanya ng pagkakataong maging bahagi ng programa, pati na rin sa mga taong nasa likod ng PBB at sa mga network na naging bahagi ng kanyang karera.

“Lubos po akong nagpapasalamat kay Kuya, sa ABS-CBN, pati na rin sa GMA 7, at higit sa lahat sa mga taong walang sawang nagpakita ng tiwala at suporta sa akin habang nasa loob ako ng bahay,” wika ni Xyriel.

Hindi niya ikinaila na noong una pa lamang ay punong-puno siya ng pangamba.

Ani niya, “Salamat dahil pinag-stay niyo ako ng a little bit longer sa in-expect ko. Kasi to be honest, akala ko talaga one week lang ako tapos mapapaaway na ako, tapos ma-fo-force evict na ako dahil sa bunganga ko, pero I stayed for more than a month.”

Ngunit kabaliktaran ng kanyang inaasahan, nagtagumpay si Xyriel na makibagay at maging bahagi ng isang dynamic at masayang samahan sa loob ng bahay. Ang karanasan daw niya ay punung-puno ng realizations, self-discovery, at pagkakaibigan. Natutunan niya raw na mahalaga ang pagiging bukas sa pakikinig, pagpapakumbaba, at pagtanggap sa iba’t ibang personalidad.

Bukod sa mga bagong kaibigang housemates, dala rin niya ang mga leksyon na makakatulong sa kanya sa labas ng Bahay ni Kuya, lalo na sa pagharap sa mga susunod na yugto ng kanyang buhay bilang isang artista at bilang isang indibidwal.

Sa kanyang paglabas sa PBB house, inulan ng mensahe ng suporta si Xyriel mula sa mga fans at netizens. Marami ang bumilib sa kanyang pagiging totoo, matapang, at bukas sa pagkatuto. Ilan sa kanila ay nagpahayag na sana’y makita si Xyriel sa mas marami pang proyekto sa telebisyon at pelikula.

Bagama’t wala na siya sa loob ng Bahay ni Kuya, sigurado namang malayo pa ang mararating ni Xyriel Manabat. Sa kanyang ipinakitang resilience at pagiging totoo, napatunayan niyang karapat-dapat siyang hangaan hindi lamang bilang artista, kundi bilang isang huwarang kabataang Pilipino.